مساء الخير مرره اشتقت لكم واشتقت للتدوين😍
جاتني اسئلة كثير عن التغيير الشامل اللي قاعده اسويه لمساحة عملي بإذن الله عبر مدونتي وقناتي باليوتيوب راح يكون عندي سلسلة مواضيع متجددة تحت عنوان تجديد الإستديو..😎
طبعا في اشياء كثير بدأت فيها قبل هالموضوع وهو تزيين الطاولة الخاصة بالكمبيوتر..
لكن لان في كم طلبات هائل على الموضوع وكيف ممكن تحصلون الصور والطريقة راح أبدا بهذا الموضوع...
كما ذكرت لكم سابقا أغلب وقتي وإنتاجي هو امام شاشة الكمبيوتر الجميلة..
لذلك ...
حطوا في بالكم هالنقاط الاتية :
- لايمكن اشتغل والمكان مو مرتب حتى لو القلم كذا مايل شوي ولا تحفة احس تشتتني 😮
- لايمكن اشتغل ولا احس فيه عبارات قدامي وصور والوان واشياء عشوائية تصف شخصيتي لانها تلهمني
- ممكن وعادي يوجد صوت ميوزك او شموع شيء يلطف الجو
- لازم يكون معي مشروب رايق زي البيرة احب طعم الرمان وموية اهم شيء وكت كات ياسلااام 😎
- احب اشتغل وزمرد بنتي حواليني احط لها اقلام والوان وشغلات تنبسط عليها المهم ماتكون بعيد عني ماارتاح واتشتت الله يحفظ لكم صغاركم يارب..🙏
- المنظم حقي لازم لازم لازم بالثلاث 😁 يكون جنب الماوس اكتب فيه كل الملاحظات والتحديثات على اي خطط او افكار ملهمة طارئة..
- اوراق ملاحظات مهمة جدا اعلقها عالكمبيوتر او حتى ستكرات
- الاهم والاهم تكون كل الاجهزة موصولة بالكهرباء الطابعة والات القص ولوح الرسم عشان احفظ وقتي ومااتشتت..
- ممم
راح اضيف الاشياء اللي ناقصة لو نسيت شيء😕
طيب
نجي هنا للاسئلة اللي وردتني
طبعا فكرتة مو من راسي اخذتها من البنترست هي ماكانت بالضبط كذا بس انا ضبطتها بلمساتي
اولا احتجت طابعة فورية هنا كل تفاصيلها وروابط الشراء
بعدين العبارات لمن اخترتها كان ببالي فكرة اني اجمع صور فقط تحمل عبارات ملهمة ومحفزة حبيت تكون باللغة الانجليزية اولا تفضيل شخصي ثانيا المحتوى العربي جدا شحيح وماعندي وقت اصمم بصراحة ...
المهم هنا تحصلون بعض اللي اخترتها وراح ازيد عليها دائما اعملوا إشتراك ومتابعة لحسابي تحسبا لاي تحديثات عالبوردز الخاصة بحسابي هنا..
بعد كذا بدأت اطبعهم من جوالي وجمعتهم وقعدت افكر بطريقة لترتيبهم، في وحدة من متابعاتي الجميلات اقترحت علي ترتيبهم بهالشكل الجميل وفعلا حسيتها اجمل تكون كذا احسن من انها تكون متوازية في الترتيب..
حطيت تحت الكمبيوتر خلفية لون اصفر لانه لون إالهامي المفضل
وحرام احط صور تحت الكمبيوتر راح تغطي..😩
طبعا اغلب الاسئلة كانت هل لازم حماية احطها فوق الصور؟
ماادري انا اشوف مالها لزمه واكره الحماية عندي عقده منها هي والتغليف الحراري وهالشغلات ...
في بنات اقترحوا علي زجاج تفصيل وعجبتني الفكره 😍 خصوصا اني احب الزجاج يعطي منظر جميل وانطباع بالنظافة دائما..
راح احطها بعين الإعتبار اذا توفرت فرصة لتفصيله ...🙌
عموما انا انسانة محافظه جدا واخاف على اشيائي من الخدشة البسيطة لذلك احس العناية الدائمة مايحتاج فوقها تكلف مادي آخر..😐
ولكم الخيار...
إنتظروا الموضوع القادم عن طاولة التحف والآلة الكاتبة ..😍😎
