N E Z A R I A R T : تصميم للبوكسات على شكل “مخده” ..

صباح الخير للي توهم صاحين واللي لسا ماناموا ..☺️

ماأدري وش أفضل توقيت أنزل فيه الاعمال ..

لان في فرق توقيت كبير بينا .. ودي أشارككم هالعمل بخطواته .. في أحد موجود ..

والا أخليه لمن تصحون و أعطيكم التفاصيل والنتيجة ..« طيب كيف بيردون عليك وهم نايمين

هالعمل يخص التوزيعات أو البوكسات الخاصة بالهدايا الصغيره ..

لاحظت في محلات وتاجرات الله يرزقهم من فضله .. يبعونها بسعر غالي للحبة..

أكيد كل شيء له جودته الخاصه والورق والطباعة فتختلف الاسعار ..

ومن مبدأ مشروعي لإعداد زينه خاص للحفلات حبيت أحط بعض الافكار اللي ممكن تساعدكم في إعداد هالبوكسات بأقل تكلفه وبأسرع وقت ..

هذا أشهر تصميم للبوكسات وهو على شكل “مخده” ..

حبيت ابدأ بهالشكل لانه سهل وسريع وثانيا ممكن تنحط فيها الحلويات للعيد او الفلوس ..

كل اللي تحتاجونه زي ماذكرت سابقا أوراق ملونه مطبوع عليها أشكال وتقدرون تحصلون كذا شكل بالنت ..

اختاروا الشكل المخصص لحفلتكم أو عيدكم والافضل يكون فيه تنويع مو كلها وردي ومنقط ..

يعني اختاري ٣ اشكال او الوان مختلفة ..

أهم نقطه تكون الطباعة على ورق مقوى عشان يثبت ومايخرب ويطلع له شكل..

بعد الطباعة نبحث عن هالقالب :

Pillow boxes Template

نطبعه في حجم صغير و كبير .. انا أستخدمت الصغير ..

*** ملاحظة*** اللي مو عارف يبحث ويوفر القالب يحصل القالب جاهز للتحميل في اسفل الموضوع..

بعد كذا نقص القوالب ولتوفير الوقت حطي ٢ او ٣ فوق بعض وقصي …

والافضل حسب سماكة الورق ومقدرتك ودقتك في التحكم بالمقص .. يعني اذا ماقدرتي وتبين يطلع القص دقيق ..قصيهم واحد واحد …

أخر خطوة وهي طوي أطراف البوكس واللصق ..

هالخطوه شوي يبيلها احتراف و دقه ..

لمن تجين تطوين الاطراف لداخل حاولي تمشين على نفس طريقة الخطوط اللي بالقالب الأصلي.. لاحظوها بالصوره الاولى ..

ولمن تطوينها فيه أداة لهالاعمال تشبه السكين يستخدمونها عشان تحدد خطوط الطويات .. بس اللي ماعنده ممكن يستخدم حافة إبرة الكروشيه … حددي فيه الطويات عشان تنطوي معك بسهوله زي اللي بالصوره هذي .. اتمنى وضحت الفكرة ..

أخر شي اللصق بس نلصق الطرف اللي عالجنب بصمغ ورق ..

من تحت وفوق تبقى مفتوحه ولاتخافون ماراح تطلع الاشياء منها …